حنان سليمان: “ابني أعاد تربيتي من جديد وعلمني إزاي أكون أُم لـ راجل” 

حنان سليمان: “ابني أعاد تربيتي من جديد وعلمني إزاي أكون أُم لـ راجل” 

كشفت الفنانة حنان سليمان، عن كواليس من حياتها الشخصية والفنية، وأشارت إلى أنها كانت ترغب بالعمل كـ صحفية أو مراسلة حربية أو صحفية تحقيقات، وتحدثت عن ابنها وعن أنها تعلمت منه كيف تكون أم لراجل.

وأكدت الفنانة قائلة: “ابني لما كبر وصوته تخن عليا كنت فاكرة إنه بيقل أدبه عليا، وهو ساعتها كان فاكرني مجنونة، وأول ما كان بيعلي صوته عليا كنت بقوله بلاش قلة أدب، ولكن أنا اتعلمت منه كتير أهمها إزاي أبقى أم لراجل”.

وواصلت حنان: “ابني أعاد تربيتي من جديد، وكمان فتح عيني على حاجات كتير مكنتش فهماها، ويمكن يكون ده السبب اللي خلاني أكتر تعاطفاً مع الراجل وبنحاز له فى كتير من الموضوعات”.

وأما عن عملها بمجال الفن، علقت قائلة: “كنت عاوزة أكون صحفية تحقيقات أو مراسلة حربية أو صحفية، ومكنتش بفكر أبداً إني أشتغل بالفن، ولكني كنت مهمومة أوي بفكر الانسان، وبعد ما دخلت معهد التمثيل اكتشفت إن اللي بعمله له علاقة كبيرة بهموم البشر وبيبني وجدان المشاهد”.

وتابعت “ومكنش بيفرق معايا حجم الدور اللي بعمله، والمهم إني أكون سعيدة إن المخرج شافني مهمة في مشهد أو اتنين ويكون ليهم تأثير فى العمل، وده زي دوري في (المال والبنون) مكملتش الجزء الأول لحد الآخر، وفي كتير من الأحيان بيكون حجم الدور الكبير خطر على الفنان”.

وأما عن سبب ابتعادها عن الوسط الفنى، ردت قائلة:ـ “مكنش برضايا إني أبعد عن مجال التمثيل، ولكن كان ليا دور فى هذا البعد، وده علشان رفضت إني أكرر نفسي لما لقيت الادوار اللي بتتعرض عليا زي اللي عملتها”.

وأنهت حديثها قائلة: “ومحستش بالظلم بعد ما بعدت عن الفن، ولكني تعلمت الصبر والتأمل بسبب الفترة اللي عشتها بعيد عن العمل بالفن، وابني كان دايماً في احتياج ليا بعد وفاة والده، وحقيقي كانت مسئولية كبيرة ومكنش ينفع أهمل فيها”.